បង្អែមចាហួយ

ដោយ សួង សុខរ៉ូ និង ជី រដ្ឋា

នៅក្នុងជំពូក៥ លេខរៀងទី៧ មាននិយាយម្តងរួចមកហើយអំពីផ្កាចាហួយ (រូបលេខ១, ប្រភពរូប៖ អាំង ជូលាន)។ ក្នុងអត្ថបទនោះ អ្នកនិពន្ធបង្ហាញថាផ្កានេះអាចទទួលទានជាអន្លក់បាន។ ក្រៅពីនេះ មើមរបស់វាក៏អាចធ្វើជាចាហួយបានដែរ។ ឥឡូវនេះ យើងខ្ញុំសូមបង្ហាញពីរបៀបធ្វើបង្ហែមចាហួយពីមើមវាវិញម្តង។ គួរជម្រាបថា រុក្ខជាតិនេះ ឃើញដុះច្រើនបំផុតនៅតំបន់ដីដែលមានទឹកជប់។ ក្រៅពីនេះគឺនៅតាមព្រៃស្រោង ពោលគឺព្រៃដែលមានឈើខ្ពស់ៗឲ្យម្លប់និងសំណើមត្រជាក់នៅខាងក្រោម ឬព្រៃស្រល់ដែលមានស្មៅដុះស្តើងទាបៗ ពុំនោះគឺនៅតាមទំនាប ឬដុបព្រៃតូចៗដែលជាដីល្បាយខ្សាច់។ ដើម្បីបានមើម គេត្រូវជីកនៅក្រោមផ្ការបស់វាតែម្តង ពោលគឺផ្កា១ទងមានមើមនៅពីក្រោមនោះ១ (រូប លេខ២-៣)។ គេកាច់ផ្កាខ្ចីៗល្មមធ្វើជាអន្លក់ ហើយគេចោលផ្កាណាដែលរីកយូរចាស់ជ្រុល។ គេត្រូវលាងសម្អាតមើមនោះឲ្យជ្រះដី បន្ទាប់មកទើបគេយកទៅចិតសម្រកចេញឲ្យស្អាត ដូចឃើញនៅរូបលេខ៤ (ប្រភពរូប ៖លី ឃ្លីន)។ រួចមក ទើបគេយកមើមទាំងនោះទៅបុកក្នុងត្បាល់ឲ្យម៉ត់ (រូបលេខ៥, ប្រភពរូប ៖ លី ឃ្លីន)។ ពេលឃើញថាម៉ត់ល្អហើយ ទើបគេយកសាច់នោះទៅច្រោះនឹងស្បៃ ហើយត្រងយកទឹកទុក។ ឯកាកល្បាយនៅសល់គេចោល។ ទឹកដែលត្រងបានគេត្រូវទុកវាឲ្យរងក្នុងមួយរយៈពេលសិនដើម្បីឲ្យសាច់ម្សៅកកនៅបាតធុង។ ពេលឃើញថាសាច់ម្សៅរងនិងកកនៅបាតអស់ហើយ ទើបគេសម្រិតទឹកចោល ហើយបារយកសាច់ម្សៅនោះទៅហាលថ្ងៃឲ្យស្ងួតល្អ។ នៅរូបលេខ៦ គឺជាម្សៅចាហួយដែលជាលទ្ធផលសម្រេច។

ដើម្បីធ្វើជាបង្អែមចាហួយ គេត្រូវយកម្សៅនោះមកកូរនឹងទឹកខ្ទិះដូង (រូបលេខ៧)។ ប៉ុន្តែគេត្រូវវាល់ម្សៅឲ្យត្រូវនឹងចំណុះទឹកសិន ពោលគឺម្សៅ១កំប៉ុងអង្ករ ត្រូវលាយនឹងទឹកខ្ទិះ៣កំប៉ុងអង្ករ ហើយបើសិនជាចង់ឲ្យចាហួយនោះកាន់តែទន់ថែមទៀត គេថែមទឹកដល់៣កំប៉ុងកន្លះ (រូបលេខ៨-៩)។ ចំណែកស្ករដែលដាក់ឲ្យផ្អែមនោះវិញ គេអាចដាក់តិចឬច្រើនតាមចំណូលចិត្ត។ ដើម្បីឲ្យផ្អែមហើយឈ្ងុយផង គេច្រើនប្រើស្ករត្នោត១ភាគ លាយនឹងស្ករស១ភាគ (រូបលេខ១០-១២)។ គេត្រូវកូរឲ្យល្បាយទាំងអស់រលាយចូលគ្នាសព្វល្អ។ បន្ទាប់មកទៀត ទើបគេយកទៅដាក់កូរលើភ្លើង។ គេត្រូវថែមអំបិលគ្រួស (ឬអំបិលម៉ត់ក៏បាន) បន្តិចចូល ដើម្បីឲ្យបានរសផ្អែមមុត (រូបលេខ១៣-១៤)។ នៅលើភ្លើង គេត្រូវកូរឲ្យជាប់មិនដកដៃ ដើម្បីកុំឲ្យម្សៅចាហួយកកខ្លោចនៅបាតឆ្នាំង (រូបលេខ១៥)។ ចំណែកភ្លើងវិញ គឺត្រូវឲ្យឆេះល្មម គឺថាកុំឲ្យខ្សោយពេក ឬខ្លាំងពេកនាំឲ្យទឹកល្បាយចាហួយឆាប់កកជាដុំៗលឿន ហើយពុះខ្ទាតមកក្រៅឆ្នាំង។

គេត្រូវកូររហូតទាល់ខះទឹកអស់ នៅសល់តែសាច់ចាហួយ (រូបលេខ១៦)។ គេអាចលើកចេញពីភ្លើងបានទាល់តែមើលឃើញថាចាហួយនោះដាច់ទឹកអស់។ ដើម្បីដឹងគឺគេលើកឈើកូរមើល។ បើសាច់ចាហួយកកលែងរាវហូរដូចទឹកហើយ នោះមានន័យថា «ដាច់ទឹក» ល្អហើយ (រូបលេខ១៧)។ នៅពេលចាហួយឆ្អិនល្អ គេលើកចេញពីភ្លើង ហើយចាក់ចូលថាសដោយមានដាក់ស្លឹកចេកទ្រាប់ពីក្រោមផង (រូបលេខ១៨)។ គេរោយសាច់ដូងពីលើដើម្បីឲ្យកាន់តែឆ្ងុយឆ្ងាញ់ថែមទៀត (រូបលេខ១៩)។ គេអាចទទួលទានក្តៅៗភ្លាមៗក៏បាន ឬទុកឲ្យត្រជាក់កាត់ជាដុំៗក៏បាន។